Mellom 2011 og 2014 drog PJ Harvey og Seamus Murphy ut på ei rekkje reiser til Kosovo, Afghanistan og Washington DC.
Murphy hadde omfattande erfaring med å fotografere konflikt og kvardagsliv i Kosovo og Afghanistan; Harvey hadde lenge vore fascinert av begge land. Washington DC representerte den absolutte verdsmakta, men hadde også bekymringar på heimebane. Med eit felles mål samla Harvey ord og Murphy bilete. I Den opne handa finn to kunstnarstemmer kvarandre i Kosovo, Afghanistan og Washington D. C.
PJ Harvey, (hennar fulle namn er Polly Jean Harvey) har utgjeve åtte kritikarroste album, blitt nominert til seks Grammy-prisar og er den einaste britiske artisten som har fått Storbritannias høgthengande Mercury-pris to gonger (for albuma Stories from the Heaven, Stories from the Sea og Let England Shake). I 2013 fekk ho Den britiske imperieordenen (MBE) for det ho har tilført musikken. I januar 2015 spela ho inn eit nytt album og ho gjorde opptaka til ein happening der publikum kunne følgje med på den skapande prosessen.
Seamus Murphy har fotografert liv og forandring verda over. Han har vunne sju World Photo Awards for arbeidet sitt i Afghanistan, Sierra Leone, Gaza, Libanon, Peru, Irland og England. Skildringane hans av Afghanistan og afghanarar frå 1994-2007 er publiserte i boka A Darkness Invisible: Afghanistan, som han seinare omarbeidde til ein prislønt film. I 2011 laga han 12 Short Films til PJ Harveys Let England Shake.
Den opne handa er PJ Harveys fyrste poesiutgjeving Dikta her er meir politiske enn det vi har vore vande med frå PJ Harvey. Albumet Let England Shake var eit vendepunkt i karriéren i så måte. Fram til da hadde sangtekstane vore meir av privat og eksistensiell karakter, men her kom den samfunnsengasjerte Harvey meir fram. Diktsamlinga er omsett av Pedro Carmona-Alvarez og Gunhild Øyehaug, begge etablerte forfattarar med eigne diktsamlingar bak seg. Orignalversjonen av dikta er med: dikta på engelsk står på venstre side medan dikta på nynorsk står på høgre side. Dette gjev samlinga Den opne handa ein ekstra styrke.
Samlaget har nyleg gjeve ut bøker til ei anna sterk rockekvinne. Sjølvbiografien til Patti Smith, Just Kids, vart gjeve ut hausten 2012. Kortprosaboka Sanka ull (“Wool Gathering”) av same forfattar gav Samlaget ut i norsk språkdrakt året etter.
Og no er det berre å vente i lengt og smerte på det neste albumet til PJ Harvey…
Avslutningsvis eit av dei kortare dikta henta frå bolken Afghanistan.
Dikt
Og lyden av gråt kom i staden for musikk
Og eg gjekk skjelvande ut og pressa ansiktet mot jorda
Og lyden av gråt kom i staden for ord eller talar
Og mørke kveldar kom ved soloppgang og jamring
steig frå landsbyen.
Poem
And sound of weeping came instead of music
And I walked out trembling and pushed my face
into the soil
And sounds of weeping came instead of words and speeches
And dark evenings arrived at dawn and wailing
rose from the village.